Nukissiuutinik atuiniviit 4,9 pct.-imik qaffapput
2021-mi nukissiuutinik atuinivik 9.258 TJ-usimavoq 2020-mi nukissiuutinik atuinivimmut sanilliullugu 4,9 pct.-imik qaffasinneruvoq, 2020-mi nukissiuutinik atuinivik 8.827 TJ-usimavoq. Nukissiuutinut atuinivinnut, piujuaannartumik nukissiorneq ilaavoq, taannalu 0,4 pct.-imik qaffassimavoq. Olianik imerpalasunik atuineq 5,9 pct.-imik qaffassimavoq. Gasuuli, olianit assigiinngitsunit atorneqarnerpaajusartoq, 10,5 pct.-inik qaffassimavoq. Timmisartunut ikummatissaq Jet A-1 19,8 pct.-imik qaffassimavoq, nappaassuaq Corona pissutaalluni angallannerup annikinnerusimanerata qaangiussimanera tassunga pissutaavoq.
Silap pissusaa tunngavigalugu nukissiuutinit atukkanik iluarsiineq 6,8 pct.-imik qaffassimavoq
Nukissiuutinik atuiniviit saniatigut silap pissusaa tunngavigalugu nukissiuutinit atukkanit iluarsiinerit Naatsorsueqqissaartarfimmit aamma suliarineqarput, Silap pissusaa nalinginnaasumit allaanerusimagaangat silap pissusaa nalinginnaasoq tunngavigalugu nukissiuutinit atukkanik iluarsiisoqartarpoq. Taamaasilluni ineriartornermi allannguutit ersersinneqartarlutik. 2021-mi silap pissusaa tunngavigalugu nukissiuutinik atuineq 9.349 TJ-usimavoq, 2020-mut sanilliullugu 6,8 pct.-inik annertunerulluni.
Nukissiuutiliorneq pingaarneq annertusivoq nammineq pilersorneq annikillisoq
2021-mi Kalaallit Nunaanni nukissiuutiliorneq 1.659 TJ-usimavoq, 0,4 pct.-imik annertusisimalluni. Nukissiuutiliorneq annerpaaq erngup nukinga atorlugu aamma eqqakkanit pisarpoq. Kalaallit Nunaanni nammineq pilersorneq 17,5 pct.-imut apparsimavoq ukioq sioqqullugu 18,3 pct.-iusimasoq. 2021-mi nukissiuutiliornerup pingaarnerup annertusisimanera aamma nammeneq pilersornerup annikillisimanera, avataanit ikummatissanik atuinerup annertusisimanera pissutaavoq. Avataani ikummatissanik atuinerup qaffasinnerusimanera pissutaalluni nukissiuutinit nammineq pilersuinermit atuinermut sanilliussinermi 2021-mi nukissiuutinit nammineq pilersuinermut atuineq appasinnerulersimavoq.
Innaallagiamik pilersuineq annerpaaq nukissiuutinit ataavartunit pisarpoq
2021-mi Nukissiorfiit innaallagiamik tunisassiornera annerpaataa, tassa 81,3 pct.-ia imermik nukissiornermit pivoq. Nukissiorfiit katillugit 1.915 TJ-mik innaallagissamik tunisassiorsimavoq.
Drivhusgassinik aniatitsineq annertusivoq
Nukissiuutinit atuinernit drivhusgassinik silaannarmik mingutsitsineq tamarmiusoq 2021-mi 5,6 pct.-imik annertusivoq, 566.518 ton CO2-ækvivalentiulluni. 1990-imut sanilliullugu 2021-mi silaannarmik mingutsitsineq 9,4 pct.-imik appasinneruvoq.
Nukissiuutsinit atuineq atuisunut immikkoortillugu
2021-mi nappaassuup Coronap atuunnerata annikillinerata kingunerisaannik atuiffiusumi Angallassineq aamma assartuineq 12,1 pct.-imik qaffappoq, 1.502 TJ-ulluni. Inuussutissarsiorfiit tunisassiortut nukissiuutinik atuinerat 9,4 pct.-imik qaffappoq 2.943 Tj-ulluni. Niuernermik aamma kiffartuussinermik inuussutissarsiortut 2,1 pct.-imik annertusivoq, 1.723 TJ-ulluni. Tunisassiornermik inuussutissarsiuteqartut akornanni nukissiuutinit atuineq 4,7 pct.-imik apparpoq, 2.237 TJ-ulluni.